تمہیں یاد ہو کہ نہ یاد ہو -

تمہیں یاد ہو کہ نہ یاد ہو -

محترم نواز شریف بھی وہی ہیں , انکے کاسہ لیس بھی وہی , وزیر اور مشیر بھی وہی , انداز و ناز بھی وہی -

جب یہ اپنی دولت کی بیساکھیوں پر پہلی بار مسند اقتدار پہ جلوہ افروز ہوۓ , انکے جلو میں اور بھی بہت سارے کہنہ مشق اور وراثتی سیاستدان بھی تھے - جو دال نہ گلنے پر الگ ہوتے گئے , مگر جن کی امیدیں اور مفادات پورے ہوتے رہے وہ آج بھی ساتھ ہیں -

ایک خوبصورت خواب دکھایا گیا کہ قوم چندہ دے تو سارا قرض اتار دیں گے - لوگوں نے حسب عادت جو جو بن پایا دے دیا - پھر کسی کو یاد ہی نہیں رہا کہ قرضہ اترا کہ نہیں -

ترقی کے خواب , موٹر وے , سڑکیں , پل اور میٹرو جیسے منصوبے بنتے رہے - قوم سمجھتی رہی کہ ترقی کا آغاز ہو گیا -

صنعتیں , زراعت , تجارت , برآمدات ,تعلیم , صحت اور دوست ملکوں سے تعلقات  برباد   ہوتے رہے , مگر ہم مگن تھے خواب دیکھنے میں - یہ خیال ہی نہیں آیا کہ یہ بڑے بڑے منصوبے ترقی نہیں تجارت ہو رہی ہے - ان پر ملنے والا کک بیک اصل ٹارگٹ ہے - یہ ہی وہ پیسہ ہے جس کو آف شور تجارت پہ لگایا جاتا رہا -

حیرانی اس معصوم صورت حکمرانوں پہ نہیں , حیرانی ان سیاستدانوں پہ ہے , ان میڈیا کے بادشاہوں پہ ہے , قومی سلامتی کے حلف لینے والوں پہ ہے کہ کسی کو خبر ہی نہیں ہوئی , کہ ملک کو ترقی کے نام پہ لوٹا جا رہا ہے -

اسے قوم کے تمام ذمہ داروں کی بے خبری کہیں , حصہ داری کہیں , غفلت کہیں یا وطن سے غداری کہیں -

وطن میں کتنے لوگ ہیں جن کے دلوں کی شریانیں بند ہیں , ان لوگوں کا وطن میں علاج کبھی حکومت کی ذمہ داری  نہیں ہوا - پھر وطن کے وسائل پہ وزیر محترم کا علاج اور وہ بھی بیرون ملک پورے پروٹوکول سے - کیوں - کیا یہ آواز کبھی اٹھے گی , کبھی کوئی دیانتدار محتسب , کوئی مسیحا , کوئی لیڈر , کوئی میڈیا کا بادشاہ , کوئی اسمبلی , کوئی محب وطن پارٹی اس کا احتساب کر سکے گی -

یقینی طور پہ نہیں -

یہ وہ محاذ ہے جس پر جب تک ہم سب انفرادی طور پہ بر سر پیکار نہیں ہونگے - جب تک ہم خود سیاسی وابستگیوں سے الگ ہو کر جدوجہد نہیں کریں گے , کچھ نہیں ہو گا -

ہمیں ووٹ , جسے قومی امانت کہتے ہیں , قومی مفادات کو سامنے رکھ کر دینا ہو گا - نعرے نہیں کارکردگی دیکھنا ہو گی , کردار دیکھنا ہو گا , ماضی کی غلطیوں کو دہرانے سے اجتناب کرنا ہو گا - رہبر اور رہزن میں فرق کرنا ہو گا - اب کی بار پھر کوئی لٹیرا آیا تو شاید ہماری نسلیں بیچ جاے -

شکریہ

 آزاد ہاشمی