کرپشن کیا ہے

کرپشن کیا ہے‎

کرپشن کیا ہے ? ہم رشوت لینے اور دینے کو کرپشن سمجھتے ہیں -   کرپشن کا مفھوم پوری طرح معلوم ہی نہیں - ہر وہ عمل جو قانونی , سماجی , معاشرتی , اخلاقی اور مذہبی قوانین و ضوابط سے ہٹ کر ہو , کرپشن کے زمرے میں آتا ہے - ایک وکیل جو اچھی طرح سے جانتا کہ اسکا کلائنٹ غلط ہے اور قانون شکنی کا مرتکب ہے , اسے بچانے کی ہر کوشش کرپشن ہے - یہ وہ ایسی کرپشن ہے جس نے عدالتی نظام کی بنیاد کھوکھلی کر دی ہے - یہی وہ مہارت ہے جو ایک وکیل کو بڑا وکیل بناتی ہے - جج بھی سب جانتے ہوۓ انصاف سے ہٹ کر فیصلہ کرے تو یہ بھی کرپشن ہے - ہم جانتے ہوۓ  بھی کہ ہمارا حمایت یافتہ امیدوار بد دیانت , شرابی , زانی اور بد کردار ہے - ووٹ دیتے ہیں تو یہ بھی کرپشن ہے - ایک مذہبی جماعت اگر مذہب کے نام پر حاصل کیے گئے وسائل کو سیاست کے  لئے استعمال کرے تو یہ بھی کرپشن ہے - اگر اسمبلیاں قانون سازی میں جھول رکھیں تو اسے بھی کرپشن ہی کہا جاے گا - ایک مزدور اگر اپنی ڈیوٹی پوری طرح سے نہیں کرے گا یا کارخانہ دار مزدور کو پوری اجرت نہیں دیتا , تو یہ سب بھی کرپشن ہی ہے - اگر ہم کرپشن کے اصل مفھوم کو سمجھ جایں تو اندازہ کرنا مشکل نہیں , کہ ہم سب کسی نہ کسی طرح کرپشن کا حصہ ہیں - سوال یہ ہے کہ اب اس بیماری کا علاج کیسے ہو - اسلام ایک ایسا نظام ہے , جو ایک معاشرے کی اجتماعی اور انفرادی اصلاح کرتا ہے - مگر ہم نے اسلام کو نماز , روزہ , حج اور دیگر عبادات تک محدود کر دیا ہے - اگر ہم حقیقی طور پر کرپشن کا خاتمہ چاہتے ہیں تو سب سے پہلے اپنی اپنی ذات کا احتساب کرنا ہو گا - کسی ایک ادارے کی اصلاح کرنے سے کچھ نہیں ہو گا - اے کاش ! ہم سمجھنے کی کوشش کریں - آزاد ہاشمی