" بابا جی سیاست میں

" بابا جی ! اگر آپ سیاست میں ہوتے تو بہت کامیاب سیاستدان ہوتے "

یہ کوئی دل لگی نہیں تھی , حقیقت تھی , وہ پکوڑے بنانے والا ایک غریب آدمی ہے , مگر قدرت نے جو سوچ اور فہم اسے عطا کر رکھا ہے , وہ شاید ہی کسی سیاستدان میں ہو - آپ کسی بھی موضوع پہ بات کریں , بابا جی کی سوچ سے ضرور متاثر ہوں گے -

" نہیں بیٹا ! یہ سیاست شریف لوگوں کا کام نہیں - اس میں بہت جھنجھٹ ہیں , مکاری اور دغا بازی اسکے بنیادی اصول ہیں - میرے جیسے لوگ اس میدان میں نہیں آ سکتے - سچ بولو گے کوئی نہیں سنے گا , کیونکہ ہمیں جھوٹ میں زیادہ مزہ آتا ہے - سچ پرانے وقتوں کی بات لگتا ہے - الله کا حکم ہے , جو وعدہ کرو پورا کرو , عہد شکنی نہیں کرو - یہ دونوں اصول سیاست میں نہیں چلتے - گویا الله کی حکم عدولی سے سیاست کا آغاز ہوتا ہے - یه کوئی خدمت نہیں , پیشہ ہے پیشہ - دولت بنانے کا بہترین ہنر ہے - کوئی لیڈر بھی خلوص سے سیاست میں نہیں آتا - کچھ کو دولت کی ہوس ہے , کچھ کو شہرت کی - کوئی اقتدار کا بھوکا ہے کوئی انتقام میں پاگل - کوئی ملک فروش ہے کوئی ایمان کا سوداگر "

بات تو ٹھیک تھی -

" بابا جی ! پاکستان بھی تو سیاست سے وجود میں آیا "

میری یہ دلیل تو بابا جی پر بجلی کی طرح گری -

" کیا کہا - یہی خرابی ہے ہماری تعلیم کی . پاکستان سیاست سے نہیں ایمان سے بنا - کلمے کے نام پہ بنا - اسلام کے نظام کے نعرے پہ بنا-  ہم نے وہ تڑپ دیکھی , وہ جذبہ دیکھا , وہ سماں دیکھا جب لوگ کہتے تھے , پاکستان کا مطلب کیا , تو آسمان  اور زمین بولتی تھی

 " لا الہ الا الله "

ہمارے دلوں سے یہ تڑپ ان غدار اور وطن فروش سیاستدانوں نے چھین لی - ان لٹیروں نے چھین  لیا  سب-

 اقبال کا تصور باقی نہیں رہنے دیا اور نہ قائد کی جان فشانی کی قدر باقی ہے -

کبھی غور کیا قوم نے کہ آج زیادہ تر سیاسی لیڈر ان کی اولاد ہیں جو نظریہ پاکستان کے مخالف تھے - کیا غلط کہہ رہا ہوں "

بابا جی کی آنکھوں میں عجیب سی چمک تھی -

" ارے اگر سیکولر ملک چاہیے تھا تو پھر اکٹھے ہی رہتے - لاکھوں جانیں قربان کیوں کیں "

" جنہوں نے قربانیاں دیں وہ میری طرح مزدوری کر رہے  ہیں , اور جو انگریز کے چمچے تھے انکی اولادیں حکمران ہیں -

کبھی گنتی کی تم لوگوں نے کہ کتنے بہروپئے آے اور چلے گئے , نہ ملک کا نظام بدلا نہ معیشت -

بد قسمتی یہ ہے کہ سارے ملا بھی مفادات کی کشتی پہ سوار ہیں "

بابا جی جو بھی کہتے ہیں , باتیں تو دل کو لگتی ہیں , مگر پکوڑے بیچنے والے کی کون سنے گا - کس کو سمجھ آئیگی یہ کتھا -

شکریہ

آزاد ہاشمی