بابا جی

بابا جی

" یہ پیسہ بہت بری چیز ہے - ہوتا ہے تو الله بھول جاتا ہے , الله کے بندے یاد نہیں رہتے , قریبی رشتے بھی اجنبی لگتے ہیں - اور جب چلا جاتا ہے تو یہ حال کر دیتا ہے "

بابا جی نے سامنے بیٹھے بھکاری کی طرف اشارہ کرتے ہوے بات ختم کی -

" کیا آپ اس بھکاری کو جانتے ہیں - یہ تو کوئی پاگل لگتا ہے "

میں نے سوال کیا -

" ہاں جانتا ہوں , یہ چند سال پہلے ایک بڑا پولیس آفیسر تھا - پیسہ اسکی منزل تھی , رحم نام کی کوئی چیز اسکے دل میں نہیں تھی - مجھے وہ وقت یاد ہے جب اس نے ایک ماں کے سامنے اسکا بیٹا گولیوں سے بھون ڈالا تھا , وہ ہاتھ جوڑتی رہی , اسکے پاؤں چھوتی رہی - ایک بے بس ماں بیٹے کی لاش پر تڑپتی دیکھتے تو سینہ پھٹ جاتا "

بابا جی کی آنکھیں ڈبڈبا گئیں , لہجہ ٹوٹ گیا اور ایک کٹے ہوۓ درخت کی طرح زمین پر بیٹھ گیا -

" وہ روتی رہی پھر یکدم خاموش ہو کر آسمان کی طرف دیکھنے لگی - چند دن اسی جگہ پہ بیٹھی رہی , پھر پتہ نہیں کہاں چلی گئی - یہ جس جگہ بیٹھا ہے  , اسی جگہ لاش تھی اس بے چارے کی "

" اسے کیا ہوا "

میں نے پوچھا

" یہ اپنی مستی موج میں گم رہا  , اپنے بچوں کے ساتھ کسی جھیل پہ پکنک منانے گیا تھا - اسکا پورا خاندان جھیل کھا گئی , کوئی ایک لاش نہیں ملی - اب یہ اکیلا ہے - اسکا کوئی رشتہ دار اسے پوچھنے بھی نہیں آتا - کھانے کے لئے روٹی مانگتا ہے , پیسے کو ہاتھ نہیں لگاتا "

" الله کی پکڑ بھی بہت سخت ہے , اگر یہ پاگل ہو جاتا تو اسکا درد کم ہو جاتا , یہ پورے ہوش و حواس میں ہے , صرف ظاہر کرتا ہے کہ اسے کچھ یاد نہیں - اس جگہ پہ آ کر محض اسلیے بیٹھتا ہے کہ شاید اس مظلوم کی ماں کبھی آ جاے اور یہ معافی مانگ سکے - "

بابا جی پھر رونے لگے -

" مائیں بیٹوں کی لاش دیکھ لیں تو کب جی سکتی ہیں - بیچاری مر گئی ہو گی - مر گئی ہو گی بیچاری "

بابا جی کے ساتھ میرے ضبط کا بندھن بھی ٹوٹ گیا - میرا  جی چاہا کہ اس ظالم کا گلہ گھونٹ دوں - مگر جو سزا الله نے منتخب کی تھی وہ میری سزا سے کہیں زیادہ اذیت ناک تھی - وہ تو خود مرنا چاہتا ہو گا , مگر موت تو اسکے اختیار میں نہیں تھی -

شکریہ

آزاد ہاشمی